Asteartea, 2014-09-16

Bideberriko lanpostuak ‘kinka larrian’ daudela salatu dute Urretxun

Gaur eguerdian Urretxuko Gernika plazan dozena bat lagun bildu dira Gipuzkoako Bideberri elkarteko 54 langilek bizi duten egoera salatzeko, batzuk pankarta eta txilibituekin, eta beste batzuk egoeraren berri ematen duten paperak banatuz. Bideberri adin txikiko gazteen harrera etxeak kudeatzen dituen elkartea da, eta Maiatzak 1ean Gipuzkoako Foru Aldundiak elkarte honekiko kontratua hautsi zuen. Elkarteko kideek azaldu dutenez “Gipuzkoako 5 herritan ditu Bideberrik harrera etxeak, eta une honetan guztira 54 lagun behartutako opor mugagabean daude eta lanpostuak kinka larrian” dituzte. Urretxuko zentruan, zehazki, 9 lagun daude egoera honetan. Hori dela eta, langileek mobilizazioekin jarraituko dutela azaldu dute “egoera tamalgarri honi irtenbidea eman diezaioten aldarrikatzeko”.